Pse pa ujë Peshkopia?


Dicitura e fotos: Banorët e Peshkopisë duke mbushur ujë nga autobotet e zjarrfikseve. Foto: dibraexpress.com

 

Në emisionin “Koha për tu zgjuar” sot (29 gusht 2017) dëgjova një qytetar të Peshkopisë të deklarojë se uji i pijshëm nuk shkon as në katet e para(!?)

Peshkopia me 15.000 banorë, qytet-fshat, nuk ka ujë. Për të, që të ketë ujë 24 orë, janë bërë disa investime.

Në vitin 1960 u ndërtua ujësjellësi i Lishanit të Epërm që e furnizonte asokohe qytetin me ujë cilësor 24 orë në ditë.

Në vitet 80-të u ndërtua ujësjellësi i Korabit duke marrë ujërat e dy burimeve të mëdha të malit.

Në vitet 2000 u ndërtua ujësjellësi i Cetushit. U harxhuan miliona euro dhe uji doli i pa përdorueshëm.

Një qytet i rrethuar nga ujësjellës dhe nga burime uji të pastër që nuk i ka asnjë qytet i Shqipërisë. Një qytet sa një fshat i vogël në Evropë pa ujë.

Çfarë bëjnë përfaqësuesit e popullit, ata që morën votën dhe u betuan se do ti shërbejnë votuesve?

Çfarë bën kryetari-kirurg i bashkisë?

Çfarë bëjnë deputetët (ende deputet) dhe deputetët e sapo votuar por ende pa u betuar?

Çfarë planesh ka qeveria Rama-2 për furnizimin me ujë të Peshkopisë dhe fshatrave poshtë saj?

Qyteti i Peshkopisë nuk e ka urgjencë shtrimin e bulevardit me pllaka guri por “shtrimin” me ujë të pijshëm nga burimet e shumta të krahinës.

Furnizimi i qyteteve dhe fshatrave me ujë të pijshëm të bollshëm, me vetërrjedhje duhet të jetë prioritet i qeverisë Rama-2, përndryshe është shkref pa u ngref.

Çfarë bëhet?

Pse heshtet?

 

Abdurahim Ashiku