Peticion drejtuar:
Presidentit të Shqipërisë Ilir Meta,
Kryeministrit Edi Rama,
Ministres së Infrastrukturës dhe Energjisë, znj. Belinda Balluku
Zoti President, komuniteti shqiptaro-amerikan me qendër në New York, SHBA, i themi JO Digës së Skavicës dhe PO alternativave energjetike.
Projekti i Digës së Skavicës cënon proceset ligjore dhe kushtetutën shqiptare, është shkatërrues për mjedisin, shkatërron identitetin dhe kulturën dibrane dhe identitetin e popullit shqiptar dhe është kundër interesit kombëtar të vendit. Është krejtësisht e pakuptueshme se si mund të jetë dhënë një leje mjedisore për një projekt hidroenergjetik në një shtrirje lumi me vlerë ekologjike dhe të rrallë sa ky i rajonit i Drinit të Zi!
Peticion kundër ndërtimit të Hidrocentralit të Skavicës
Ne, shqiptarët e Amerikës, qëndrojmë kundër projektit të digës së Skavicës, sepse ky projekt:
- Do të ndikojë në zhdukjen e identitetit dibran dhe atij shqiptar, bashkë me trashëgimet kulturore, historike dhe antike ku ndodhen rreth 60,000-110,000 shqiptarë nga Dibra [të njohur si dibranë].
- Po përshpejtohet nga ana e procesit të saj ligjor, veçanërisht është mohuar e drejta e dibranëve për fjalën e lirë, paraprake dhe të informuar sipas Kushtetutës së Shqipërisë.
- Nuk konsideron alternativa të tjera për sigurimin e energjisë në vend. Sot ekzistojnë alternativa më të mira sesa ndërtimi i hidrocentralit të madh të Skavicës dhe duhet të merren parasysh në planifikimin e projektit. Burimet e tjera të energjisë – që vijnë nga era dhe dielli – janë provuar të jenë ekonomikisht konkurruese, mund të ndërtohen më shpejt dhe nuk përkeqësojnë klimën në vend.
- Do të shkatërrojë biodiversitetin dhe habitatin e shumë specieve në më shumë se dhjetë mijë hektarë të qarkut të Dibrës dhe do të rrezikojë 60,000 banorë në rrjedhën e poshtme me rrezikun e përmbytjeve masive, pasi kjo digë nuk mund të mbajë prurje të mëdha ujërash nga lumi;
- Do të sjellë një kredi të panevojshme prej 530 milionë eurosh nga SHBA, duke përkeqësuar më tej ekonominë tonë të zhytur në borxhe dhe do t’ju kushtojë trefish për ta mirëmbajtur.
- Do të jetë e domosdoshme që çdo shqiptar, përfshirë edhe ata jashtë Dibrës, të mbajnë mbi supe borxhin.
- Ka një jetëgjatësi të shkurtër për shkak të shkallës së lartë të sedimentimit në zonë.
- Gjeneron kosto të larta të mirëmbajtjes së rezervuarëve dhe një jetëgjatësi relativisht të shkurtër, pasi ngarkesa e lartë e sedimenteve të grimcave të imta dhe të trashë do të mbushë rezervuarin.
- Si pasojë e ndërtimit të hidrocentralit, Skavica do të ndikojë në rritjet e rreziqeve të aktivitetit sizmik në qarkun e Dibrës.
- Si pasojë e kostos shumë të lartë të mirëmbajtjes, mund të bëjë që qeveria jonë të dorëzojë territorin e Dibrës për të shlyer kredinë.
Në përputhje me këto rreziqe, ne, komuniteti shqiptar i Dibrës i bëjmë thirrje qeverisë shqiptare, konkretisht Presidentit të Shqipërisë Ilir Meta, Kryeministrit Edi Rama dhe Ministres së Infrastrukturës dhe Energjisë Belinda Balluku:
- Të bihet dakord për një periudhë kohore në muajt në vijim (janar – prill) të vitit 2022 për një rishikim të plotë të planeve aktuale të zhvillimit të hidrocentraleve në pellgun e lumit Drini i Zi.
- Krijimi i një “Tryezë të rrumbullakët shkencore të Skavicës” ku përfshihen ekspertë vendas dhe ndërkombëtarë për të lejuar marrjen e vendimeve të informuara për çështjet kyçe të identifikuara në lidhje me pellgun ujëmbledhës të lumit Drini i Zi.
- Ndiqni angazhimet politike dhe ligjore të Shqipërisë për të përmbushur konventat ndërkombëtare si dhe kërkesat e Bashkimit Evropian.
- Të shqyrtohen alternativa të tjera energjia si ajo diellore, nga era, geotermale dhe të ndalohet kategorikisht ndërtimi i një hidrocentrali të madh në Shqipëri me përmasat si ajo e Skavicës.
- Të dëgjohet zëri i banorëve të Dibrës që ndikohen drejtpërdrejtë nga përmbytja e vendit të tyre dhe fshatrave fqinjë të rajonit të Dibrës, identiteti, historia, kultura dhe shtëpitë e trojet e të cilëve rrezikohen të zhduken përgjithmonë.
30 dhjetor 2021